Exo 13 | CopSahBible2 | STEP | ⲡⲉϫⲁϥ ⲛⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ

Exodus 13

1 ⲡⲉϫⲁϥ ⲛⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ 2 ϫⲉ ⲧⲃⲃⲟ ⲛⲁⲓ ⲛⲡϣⲣⲡⲙⲙⲓⲥⲉ ⲛⲓⲙ ⲉⲧⲟⲩⲛⲁϫⲡⲟϥ ⲉⲧⲛⲁⲟⲩⲱⲛϩ ϩⲟⲟⲩⲧ ⲛⲓⲙ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥ ϫⲓⲛ ⲙⲡⲣⲱⲙⲉ ϣⲁ ⲡⲧⲃⲛⲏ ⲉϥⲛⲁϣⲱⲡⲉ ⲛⲁⲓ 3 ⲡⲉϫⲁϥ ⲛⲇⲉ ⲛϭⲓ ⲙⲱⲩⲥⲏⲥ ⲛⲛⲁϩⲣⲛ ⲡⲗⲁⲟⲥ ϫⲉ ⲁⲣⲓⲡⲙⲉⲉⲩⲉ ⲙⲡⲉⲉⲓϩⲟⲟⲩ ⲉⲛⲧⲁⲧⲉⲧⲛⲉⲓ ⲉⲃⲟⲗ ⲛϩⲏⲧϥ ϩⲙ ⲡⲕⲁϩ ⲛⲕⲏⲙⲉ ⲉⲃⲟⲗ ϩⲛ ⲡⲏⲉⲓ ⲛⲧⲉⲧⲛⲙⲛⲧϩⲙϩⲁⲗ ϩⲣⲁⲓ ⲅⲁⲣ ϩⲛ ⲟⲩϭⲓϫ ⲉⲥϫⲟⲟⲣ ⲁϥⲛⲧⲏⲩⲧⲛ ⲉⲃⲟⲗ ϩⲛ ⲡⲉⲉⲓⲙⲁ ⲛⲛⲉⲧⲛⲟⲩⲱⲙ ⲟⲩⲑⲁⲃ 4 ϩⲣⲁⲓ ⲅⲁⲣ ϩⲙ ⲡⲟⲟⲩ ⲛϩⲟⲟⲩ ⲛⲧⲱⲧⲛ ⲉⲧⲉⲧⲛⲛⲏⲩ ⲉⲃⲟⲗ ϩⲙ ⲡⲉⲃⲟⲧ ⲃⲃⲣⲣⲉ 5 ⲉⲥⲉϣⲱⲡⲉ ⲉⲣⲉϣⲁⲛⲡϫⲟⲉⲓⲥ ⲡⲉⲕⲛⲟⲩⲧⲉ ϫⲓⲧⲕ ⲉϩⲟⲩⲛ ⲉⲡⲕⲁϩ ⲛⲛⲉⲭⲁⲛⲁⲛⲁⲓⲟⲥ ⲙⲛ ⲛⲉⲭⲉⲧⲧⲁⲓⲟⲥ ⲙⲛ ⲛⲉⲩⲁⲓⲟⲥ ⲙⲛ ⲛⲁⲙⲟⲣⲣⲁⲓⲟⲥ ⲙⲛ ⲛⲉⲅⲉⲣⲅⲉⲥⲁⲓⲟⲥ ⲙⲛ ⲛⲉⲫⲉⲣⲉⲍⲁⲓⲟⲥ ⲙⲛ ⲛⲓⲉⲃⲟⲩⲥⲁⲓⲟⲥ ⲧⲁⲓ ⲛⲧⲁⲡϫⲟⲉⲓⲥ ⲱⲣⲕ ⲙⲙⲟϥ ⲛⲛⲉⲕⲉⲓⲟⲧⲉ ⲉϯ ⲙⲙⲟϥ ⲛⲁⲕ ⲟⲩⲕⲁϩ ⲉϥϣⲟⲩⲉ ⲉⲣⲱⲧⲉ ⲉⲃⲟⲗ ϩⲓ ⲉⲃⲓⲱ ⲉⲕⲉⲉⲓⲣⲉ ⲙⲡⲉⲉⲓϣⲙϣⲉ ⲙⲡⲉⲉⲓⲉⲃⲟⲧ 6 ⲥⲟⲟⲩ ⲛϩⲟⲟⲩ ⲉⲧⲉⲧⲛⲉⲟⲩⲱⲙ ⲛϩⲉⲛⲁⲑⲁⲃ ϩⲙ ⲡⲙⲉϩⲥⲁϣϥ ⲛⲇⲉ ⲛϩⲟⲟⲩ ⲡϣⲁ ⲙⲡϫⲟⲉⲓⲥ ⲡⲉ 7 ⲉⲧⲉⲧⲛⲉⲟⲩⲱⲙ ⲛϩⲉⲛⲁⲑⲁⲃ ⲙⲡⲥⲁϣϥ ⲛϩⲟⲟⲩ ⲛⲛⲉⲗⲁⲁⲩ ⲉϣⲁϥϫⲓⲑⲁⲃ ⲟⲩⲇⲉ ⲑⲁⲃ ⲟⲩⲱⲛⲉϩ ⲉⲃⲟⲗ ϩⲛ ⲛⲉⲕⲧⲟⲟϣ ⲧⲏⲣⲟⲩ 8 ⲛⲅϫⲟⲟⲥ ⲙⲡⲉⲕϣⲏⲣⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲉⲕϫⲱ ⲙⲙⲟⲥ ϫⲉ ⲉⲧⲃⲉ ⲡⲁⲓ ⲁⲡϫⲟⲉⲓⲥ ⲡⲛⲟⲩⲧⲉ ⲉⲓⲣⲉ ⲛⲁⲓ ⲉⲉⲓⲛⲏⲩ ⲉⲃⲟⲗ ϩⲛ ⲕⲏⲙⲉ 9 ⲛϥϣⲱⲡⲉ ⲛⲟⲩⲙⲁⲉⲓⲛ ⲉϩⲣⲁⲓ ⲉϫⲛ ⲧⲉⲕϭⲓϫ ⲁⲩⲱ ⲟⲩⲣⲡⲙⲉⲉⲩⲉ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ϫⲉⲕⲁⲥ ⲉⲣⲉⲡⲛⲟⲙⲟⲥ ⲙⲡϫⲟⲉⲓⲥ ϣⲱⲡⲉ ϩⲛ ⲧⲉⲕⲧⲁⲡⲣⲟ ϩⲣⲁⲓ ⲅⲁⲣ ϩⲛ ⲟⲩϭⲓϫ ⲉⲥϫⲟⲟⲣ ⲁⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲧⲕ ⲉⲃⲟⲗ ϩⲛ ⲕⲏⲙⲉ 10 ⲛⲧⲉⲧⲛϩⲁⲣⲉϩ ⲉⲡⲉⲉⲓⲛⲟⲙⲟⲥ ⲕⲁⲧⲁ ⲛⲉoⲩⲟⲉⲓϣ ⲛⲛⲉϥⲟⲩⲛⲟⲟⲩⲉ ϫⲓⲛ ⲛⲉϥϩⲟⲟⲩ ϣⲁϩⲣⲁⲓ ⲉⲛⲉϥⲟⲩⲛⲟⲟⲩⲉ 11 ⲛⲥϣⲱⲡⲉ ⲉⲣⲉϣⲁⲛⲡϫⲟⲉⲓⲥ ⲡⲉⲕⲛⲟⲩⲧⲉ ϫⲓⲧⲕ ⲉϩⲟⲩⲛ ⲉⲡⲕⲁϩ ⲛⲛⲉⲭⲁⲛⲁⲛⲁⲓⲟⲥ ⲛⲑⲉ ⲛⲧⲁϥⲱⲣⲕ ⲙⲙⲟϥ ⲛⲛⲉⲕⲉⲓⲟⲧⲉ ⲛϥϯ ⲙⲙⲟϥ ⲛⲁⲕ 12 ⲉⲕⲉⲡⲱⲣϫ ⲉⲃⲟⲗ ⲛϩⲟⲟⲩⲧ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲟⲩⲟⲛ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲛⲛⲉⲕⲉϩⲟⲟⲩ ⲙⲛ ⲛⲉⲕⲧⲃⲛⲟⲟⲩⲉ ⲛⲁⲓ ⲉⲧⲛⲁϣⲱⲡⲉ ⲛⲁⲕ ⲛϩⲟⲟⲩⲧ ⲉⲕⲉⲧⲃⲃⲟ ⲙⲙⲟⲟⲩ ⲙⲡϫⲟⲉⲓⲥ 13 ⲉⲓⲱ ⲛⲓⲙ ⲉⲧⲛⲁⲟⲩⲱⲛ ⲛⲧⲟⲟⲧⲉ ⲉⲕⲛⲁϣⲃⲧϥ ⲛⲟⲩⲉⲥⲟⲟⲩ ⲉϣⲱⲡⲉ ⲛⲇⲉ ⲉⲕⲧⲙϣⲃⲧϥ ⲉⲕⲉⲥⲱⲧⲉ ⲙⲙⲟϥ ϣⲣⲡⲙⲙⲓⲥⲉ ⲛⲓⲙ ⲛⲣⲱⲙⲉ ⲉⲃⲟⲗ ϩⲛ ⲛⲉⲕϣⲏⲣⲉ ⲉⲕⲉⲥⲱⲧⲉ ⲙⲙⲟⲟⲩ 14 ⲉⲣϣⲁⲛⲡⲉⲕϣⲏⲣⲉ ⲛⲇⲉ ϫⲛⲟⲩⲕ ⲉϥϫⲱ ⲙⲙⲟⲥ ⲙⲛⲛⲥⲱⲥ ⲉⲕⲉϫⲟⲟⲥ ⲛⲁϥ ϫⲉ ϩⲣⲁⲓ ϩⲛ ⲟⲩϭⲓϫ ⲉⲥϫⲟⲟⲣ ⲁⲡϫⲟⲉⲓⲥ ⲛⲧⲛ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ⲉⲃⲟⲗ ϩⲛ ⲡⲏⲉⲓ ⲛⲧⲛⲙⲛⲧϩⲙϩⲁⲗ 15 ⲁⲩⲱ ⲛⲧⲉⲣⲉϥⲛϣⲟⲧ ⲛϭⲓ ⲫⲏⲧ ⲙⲫⲁⲣⲁⲱ ⲉⲕⲁⲁⲛ ⲉⲃⲟⲗ ⲁϥⲙⲟⲩⲟⲩⲧ ⲛϣⲣⲡⲙⲙⲓⲥⲉ ⲛⲓⲙ ϩⲣⲁⲓ ϩⲙ ⲡⲕⲁϩ ⲛⲕⲏⲙⲉ ϫⲓⲛ ⲛϣⲣⲡⲙⲙⲓⲥⲉ ⲛⲣⲣⲱⲙⲉ ϣⲁϩⲣⲁⲓ ⲉⲛϣⲣⲡⲙⲙⲓⲥⲉ ⲛⲛⲧⲃⲛⲟⲟⲩⲉ ⲉⲧⲃⲉ ⲡⲁⲓ ⲁⲛⲟⲕ ϯϣⲱⲱⲧ ⲛⲛⲁϩⲣⲙ ⲡϫⲟⲉⲓⲥ ⲛϩⲟⲟⲩⲧ ⲛⲓⲙ ⲉⲧⲛⲁⲟⲩⲱⲛ ⲉⲧⲟⲟⲧⲉ ⲁⲩⲱ ϯⲛⲁⲥⲱⲧⲉ ⲛϣⲣⲡⲙⲙⲓⲥⲉ ⲛⲓⲙ ⲛⲛⲁϣⲏⲣⲉ 16 ⲛϥϣⲱⲡⲉ ⲛⲟⲩⲙⲁⲉⲓⲛ ⲉϩⲣⲁⲓ ⲉϫⲛ ⲧⲉⲕϭⲓϫ ⲁⲩⲱ ⲛⲁⲧⲕⲓⲙ ⲙⲡⲉⲙⲧⲟ ⲉⲃⲟⲗ ⲛⲛⲉⲕⲃⲁⲗ ϩⲣⲁⲓ ⲛⲅⲁⲣ ϩⲛ ⲟⲩϭⲓϫ ⲉⲥϫⲟⲟⲣ ⲡϫⲟⲉⲓⲥ ⲁϥⲛⲧⲕ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ 17 ⲛⲧⲉⲣⲉⲫⲁⲣⲁⲱ ⲛⲇⲉ ⲕⲱ ⲉⲃⲟⲗ ⲙⲡⲗⲁⲟⲥ ⲙⲡⲉⲛⲟⲩⲧⲉ ϫⲓⲙⲟⲉⲓⲧ ϩⲏⲧⲟⲩ ⲉⲧⲉϩⲓⲏ ⲙⲫⲩⲗⲓⲥⲧⲓⲉⲓⲙ ϫⲉ ⲛⲉⲥϩⲏⲛ ⲉϩⲟⲩⲛ ⲁϥϫⲟⲟⲥ ⲛⲅⲁⲣ ⲛϭⲓ ⲡⲛⲟⲩⲧⲉ ϫⲉ ⲙⲏⲡⲟⲧⲉ ⲛϥⲣϩⲧⲏϥ ⲛϭⲓ ⲡⲗⲁⲟⲥ ⲉϥϣⲁⲛⲛⲁⲩ ⲉⲩⲡⲟⲗⲉⲙⲟⲥ ⲛϥⲕⲧⲟϥ ⲉϩⲣⲁⲓ ⲉⲕⲏⲙⲉ 18 ⲁⲡⲛⲟⲩⲧⲉ ⲕⲧⲟ ⲙⲡⲗⲁⲟⲥ ⲉⲧⲉϩⲓⲏ ⲉⲧϫⲁⲓⲉⲓⲱⲟⲩ ⲉⲧⲉⲣⲩⲑⲣⲁ ⲑⲁⲗⲁⲥⲥⲁ ϩⲛ ⲧⲙⲉϩϯ ⲛⲇⲉ ⲛⲅⲉⲛⲉⲁ ⲁⲛϣⲏⲣⲉ ⲙⲡⲓ︤ⲏ︦ⲗ︥ ⲁⲩⲉⲓ ⲉϩⲣⲁⲓ ⲉⲃⲟⲗ ϩⲛ ⲕⲏⲙⲉ 19 ⲁϥϫⲓ ⲛⲇⲉ ⲛϭⲓ ⲙⲱⲩⲥⲏⲥ ⲛⲛⲕⲉⲉⲥ ⲛⲓⲱⲥⲏⲫ ⲛⲙⲙⲁϥ ϩⲛ ⲟⲩⲁⲛⲁϣ ⲛⲅⲁⲣ ⲁⲓⲱⲥⲏⲫ ⲧⲁⲣⲕⲟ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲉϥϫⲱ ⲙⲙⲟⲥ ϫⲉ ϩⲛ ⲟⲩϭⲙⲡϣⲓⲛⲉ ⲡϫⲟⲉⲓⲥ ⲛⲁϭⲙⲡⲉⲧⲛϣⲓⲛⲉ ⲉⲧⲉⲧⲛⲉϫⲓ ⲛⲛⲁⲕⲉⲉⲥ ⲉϩⲣⲁⲓ ⲛⲙⲙⲏⲧⲛ 20 ⲁⲩⲧⲱⲟⲩⲛ ⲛⲇⲉ ⲛϭⲓ ⲛϣⲏⲣⲉ ⲙⲡⲓ︤ⲏ︦ⲗ︥ ⲉⲃⲟⲗ ϩⲛ ⲥⲟⲭⲭⲱⲑ ⲁⲩⲙⲟⲟϣⲉ ⲉϩⲣⲁⲓ ⲉⲛⲟⲑⲟⲙ ϩⲁⲧⲙ ⲡϫⲁⲓⲉ 21 ⲡⲛⲟⲩⲧⲉ ⲛⲇⲉ ⲛⲉϥⲙⲟⲟϣⲉ ϩⲏⲧⲟⲩ ⲡⲉ ⲙⲡⲉϩⲟⲟⲩ ⲙⲉⲛ ⲛⲟⲩⲥⲧⲩⲗⲟⲥ ⲛⲕⲗⲟⲟⲗⲉ ⲉⲧⲟⲩⲟⲟⲩ ⲉⲧⲉϩⲓⲏ ⲛⲧⲉⲩϣⲏ ⲛⲇⲉ ⲛⲟⲩⲥⲧⲩⲗⲟⲥ ⲛⲥⲁⲧⲉ 22 ⲙⲡϥⲱϫⲛ ⲛϭⲓ ⲡⲉⲥⲧⲩⲗⲟⲥ ⲛⲕⲗⲟⲟⲗⲉ ⲙⲡⲉϩⲟⲟⲩ ⲁⲩⲱ ⲡⲉⲥⲧⲩⲗⲟⲥ ⲛⲥⲁⲧⲉ ⲛⲧⲉⲩϣⲏ ⲙⲡⲉⲙⲧⲟ ⲉⲃⲟⲗ ⲙⲡⲗⲁⲟⲥ ⲧⲏⲣϥ